अनिल कुमार यादव । रौतहट जिल्लाको दुर्गा भगवती गाउँपालिकामा विकास निर्माण, धार्मिक कार्यक्रम तथा स्वास्थ्य सामग्री खरिद प्रक्रियामा व्यापक आर्थिक अनियमितता भएको आरोप सार्वजनिक भएपछि स्थानीय तहमा तरंग उत्पन्न भएको छ। गाउँपालिकाकी उपाध्यक्ष शिला देवीले नै सार्वजनिक रूपमा भ्रष्टाचार भएको दाबी गर्दै अख्तियार दुरुपयोग अनुसन्धान आयोग लगायत सम्बन्धित निकायसँग निष्पक्ष र उच्चस्तरीय छानबिनको माग गरेकी छन्।
उपाध्यक्ष देवीका अनुसार गाउँपालिकाबाट सञ्चालित विभिन्न योजना तथा कार्यक्रमहरूमा सार्वजनिक स्रोत–साधनको दुरुपयोग भएको आशंका गरिएको छ। धार्मिक कार्यक्रम तथा मन्दिर पूजाका नाममा नक्कली बिल तथा भरपाई तयार गरी सरकारी रकम खर्च गरिएको, विकास निर्माण योजनाहरूमा गुणस्तरहीन काम गराई वास्तविक लागतभन्दा बढी रकमको भुक्तानी गरिएको तथा स्वास्थ्य चौकीका लागि खरिद गरिने औषधिमा बजार मूल्यभन्दा बढी रकम भुक्तानी गरिएको आरोप लगाइएको छ।
स्थानीय स्रोतहरूले गाउँपालिकाका प्रमुख प्रशासकीय अधिकृत मनिष झामाथि योजना भुक्तानी तथा ठेक्का प्रक्रियामा अनियमितता भएको आरोप लगाएका छन्। केही स्थानीयको दाबीअनुसार कुनै पनि योजनाको भुक्तानी वा ठेक्का प्रक्रियामा कमिसनको चलखेल हुने गरेको गुनासो छ। यद्यपि, यी आरोपहरू सम्बन्धित निकायबाट पुष्टि भइसकेका छैनन्।
उपाध्यक्ष शिला देवीले भनिन्, “पालिकामा भइरहेको अनियमितताले सीमा नाघिसकेको छ। मन्दिरको पूजादेखि स्वास्थ्य चौकीको औषधिसम्म कमिसनको चलखेल भएको गम्भीर गुनासो आएको छ। यसबारे अख्तियार दुरुपयोग अनुसन्धान आयोग तथा सम्बन्धित निकायले निष्पक्ष र उच्चस्तरीय छानबिन गरी सत्यतथ्य सार्वजनिक गर्नुपर्छ र दोषी देखिए कानुनबमोजिम कारबाही हुनुपर्छ।”
स्थानीय नागरिकहरूले पनि गाउँपालिकामा सञ्चालन भएका योजना, खरिद प्रक्रिया, भुक्तानी विवरण तथा खर्चको स्वतन्त्र लेखापरीक्षण गर्न माग गरेका छन्। उनीहरूका अनुसार सार्वजनिक बजेटको पारदर्शी प्रयोग सुनिश्चित गर्न सम्बन्धित निकायको प्रभावकारी हस्तक्षेप आवश्यक रहेको छ।
यस घटनाले स्थानीय तहमा सुशासन, वित्तीय अनुशासन र सार्वजनिक उत्तरदायित्वमाथि गम्भीर प्रश्न उठाएको छ। यदि आरोपहरू सत्य सावित भए सार्वजनिक सम्पत्तिको दुरुपयोग भएको ठहरिनेछ भने आरोप निराधार भए सम्बन्धित पदाधिकारीको प्रतिष्ठामा परेको असरसमेत स्पष्ट हुनेछ। त्यसैले निष्पक्ष, स्वतन्त्र र तथ्यमा आधारित छानबिन नै यस विवादको उचित समाधान हुने सरोकारवालाहरूको भनाइ छ।
यस विषयमा प्रमुख प्रशासकीय अधिकृत मनिष झा, गाउँपालिका अध्यक्ष वा अन्य आरोपित पक्षको आधिकारिक प्रतिक्रिया प्राप्त हुन सकेको छैन। प्रतिक्रिया प्राप्त भएमा समाचार अद्यावधिक गरिनेछ।
