जनकपुरधाम । जनकपुरस्थित प्रादेशिक अस्पतालमा जन्मिएको नवजात शिशुको पहिचानबारे स्पष्ट हुनुपर्ने भन्दै महोत्तरीका एक व्यक्तिले डीएनए परीक्षणको माग गरेका छन्।
महोत्तरीको भङ्गहा नगरपालिका–९ निवासी २४ वर्षीय अरुण सदाले यस विषयमा आवश्यक जाँच गरिदिन माग गर्दै जिल्ला प्रहरी कार्यालय धनुषामा निवेदन दिएका हुन्।
अरुणका अनुसार, उनकी २० वर्षीया पत्नी सरितालाई प्रसव व्यथा लागेपछि शुक्रबार अपराह्न ४ बजे अस्पताल भर्ना गरिएको थियो। सोही दिन साँझ ६ बजेर ३७ मिनेटमा उनले शिशुलाई जन्म दिएकी थिइन्।
अरुणले जन्मपछि आफू र परिवारका सदस्यलाई देखाइएको शिशु छोरा रहेको तर केही समयपछि छोरी देखिएको बताएका छन्। अस्पतालका नर्सले पनि छोरी नै भएको बताएपछि उनले शिशुको पहिचानबारे आशंका व्यक्त गरेका हुन्।
यस विषयमा स्पष्टता ल्याउन अरुणले शनिबार नवजात शिशु र आफ्नो डीएनए परीक्षणका लागि नमुना संकलन गरिदिन प्रहरीसमक्ष माग गरेका छन्।
शिशु साटिएको भन्ने विषयमा हालसम्म पुष्टि भएको जानकारी छैन। घटनाबारे अस्पतालको अभिलेख, सम्बन्धित व्यक्तिको भनाइ र आवश्यक परीक्षणबाट तथ्य स्पष्ट हुन सक्नेछ।
