काठमाडौं । वेब प्रविधि पीएचपी (PHP) मा देखिएको गम्भीर सुरक्षा जोखिमलाई ध्यानमा राख्दै नेपाल राष्ट्र बैंकले आफ्नो वेबसाइटसहित केही सेवा अस्थायी रूपमा बन्द गरेको छ। सम्भावित साइबर सुरक्षा जोखिमबाट बच्न यस्तो कदम चालिएको बैंकले जनाएको छ।

राष्ट्र बैंकले बिहीबार सार्वजनिक सूचना जारी गर्दै विश्वव्यापी रूपमा देखिएको सुरक्षा समस्याका कारण वेबसाइट तथा अन्य सेवा अस्थायी रूपमा बन्द गरिएको जानकारी दिएको हो। यस निर्णयले बैंकिङ तथा वित्तीय क्षेत्रका निकाय र सर्वसाधारणलाई केही समय असुविधा हुन सक्ने बैंकले स्वीकार गरेको छ।

सेवा बन्द रहेको अवधिमा राष्ट्र बैंकसँग सम्बन्धित अत्यावश्यक सूचना तथा जानकारीका लागि बैंकका आधिकारिक सामाजिक सञ्जालमा प्रकाशित विवरण हेर्न सर्वसाधारणलाई अनुरोध गरिएको छ।

यसैबीच, राष्ट्र बैंकले सम्भावित जोखिमबाट सुरक्षित रहन बैंक तथा वित्तीय संस्था, भुक्तानी प्रणाली सञ्चालक (पीएसओ), भुक्तानी सेवा प्रदायक (पीएसपी) र विप्रेषण कम्पनीहरूलाई आवश्यक सुरक्षा उपाय अपनाउन आग्रह गरेको छ। प्रयोगमा रहेका सूचना प्रणालीको सुरक्षा मजबुत बनाउन र नियमित निगरानी बढाउन पनि सम्बन्धित संस्थाहरूलाई सचेत गराइएको छ।

राष्ट्र बैंकबाहेक नबिल बैंक र सिद्धार्थ बैंकलगायतका वित्तीय संस्थाले समेत सूचना जारी गर्दै प्राविधिक समस्याबारे जानकारी दिएका छन्।

के हो पीएचपीमा देखिएको सुरक्षा जोखिम?

पीएचपी (PHP) वेबसाइट तथा वेब एप्लिकेसन निर्माणमा व्यापक रूपमा प्रयोग हुने खुला स्रोतमा आधारित स्क्रिप्टिङ भाषा हो। तीन दशकभन्दा लामो समयदेखि प्रयोगमा रहेको यो प्रविधिबाट विश्वका धेरै वेबसाइट तथा अनलाइन सेवा सञ्चालन हुँदै आएका छन्।

यस प्रविधिमा सुरक्षा कमजोरी देखिएमा त्यसमा आधारित प्रणालीहरू प्रभावित हुन सक्ने जोखिम रहन्छ। त्यसैले सम्भावित साइबर आक्रमण रोक्न र प्रयोगकर्ताको विवरण तथा प्रणालीको सुरक्षा कायम राख्न सम्बन्धित निकायले सावधानी अपनाउनु आवश्यक हुन्छ।

राष्ट्र बैंकले सेवा अस्थायी रूपमा बन्द गरेर सुरक्षा सतर्कता अपनाएको जनाएको छ। यद्यपि, उपलब्ध विवरणका आधारमा राष्ट्र बैंकको प्रणालीमा साइबर आक्रमण भइसकेको वा प्रयोगकर्ताको तथ्यांक चुहिएको निष्कर्ष निकाल्न सकिँदैन।