पर्यटक भिसामा आइ क्रिश्चियन मिशनका लागि स्वास्थ्य शिविर सञ्चालन गर्ने दश विदेशी नागरिक पक्राउ परेका छन् ।
पर्यटक भिसामा नेपाल आएर आवश्यक अनुमति नलिई स्वास्थ्य शिविर सञ्चालन गरेको आरोपमा १० जना विदेशी नागरिकको कागजात अध्यागमन विभाग पठाइएको छ। मोरङको कानेपोखरी गाउँपालिका–७, बरगाछीमा सञ्चालित शिविरमा विदेशी चिकित्सकसहितका नागरिक सहभागी भएपछि उनीहरूमाथि अनुगमन गरिएको गृह मन्त्रालयले जनाएको छ।
मन्त्रालयका अनुसार ‘मर्सी डेभलपमेन्ट’ नामक संस्थाको आयोजनामा सञ्चालित शिविरमा पर्यटक भिसामा आएका विदेशी नागरिक संलग्न रहेको पाइएको थियो। विदेशी नागरिक अनुगमन जिल्ला समितिको निर्णयअनुसार उनीहरूका राहदानी तथा आवश्यक कागजात थप कारबाहीका लागि अध्यागमन विभाग पठाइएको हो।
कात्तिक ८ गतेदेखि चार दिनसम्म सञ्चालन गर्ने तयारीसहित सुरु गरिएको शिविरमा १० जना विदेशी नागरिकले सेवा प्रदान गरिरहेका थिए। शिविरको व्यवस्थापन पास्टर पावेल दङ्गालले गरेको जनाइएको छ।
अस्पताल निर्माणका लागि भनिएको जग्गामा धार्मिक गतिविधि
स्थानीयस्तरमा अस्पताल निर्माण गर्ने उद्देश्यले प्रयोग गरिने भनिएको जग्गामा स्वास्थ्य शिविर सञ्चालन गरिएको थियो। उक्त स्थानमा यसअघि पास्टर बाङदेलले क्रिश्चियन धार्मिक कक्षा सञ्चालन गर्दै आएको बताइएको छ।
स्थानीय किराना व्यवसायी नवराज श्रेष्ठले अस्पताल निर्माण गर्ने उद्देश्यले तीन कट्ठा जग्गामा छवटा साना तथा ठूला भवन बनाएको विवरण सार्वजनिक भएको छ। तर, ती भवनमा धार्मिक गतिविधि तथा अन्य कार्यक्रम सञ्चालन हुन थालेपछि स्थानीयस्तरमा विवाद उत्पन्न भएको जनाइएको छ।
विवादपछि स्थानीयलाई खुसी पार्ने उद्देश्यले श्रेष्ठले स्वास्थ्य शिविर आयोजना गरेको विवरणमा उल्लेख छ। हाल उक्त परिसरमा दुई जना पास्टर र केही सिलाइकटाइ प्रशिक्षक बस्दै आएको पाइएको छ।
तीन देशका नागरिक शिविरमा सहभागी
शिविरमा ब्राजिल, क्यानडा र अमेरिकाका नागरिक सहभागी रहेको पाइएको छ। उपलब्ध विवरणअनुसार सहभागी १० जनामध्ये तीन जना ब्राजिलका, दुई जना क्यानडाका र पाँच जना अमेरिकी नागरिक रहेका छन्।
उनीहरू सन् २०२६ अक्टोबर २२ र २३ मा नेपाल प्रवेश गरेको तथा भिसाको अवधि नोभेम्बर ६ देखि २१ सम्म रहेको जनाइएको छ।
पर्यटक भिसामा नेपाल आएका विदेशी नागरिकले स्वास्थ्य शिविर सञ्चालन गर्न आवश्यक अनुमति नलिएको विषयमा सम्बन्धित निकायले थप प्रक्रिया अघि बढाएको छ।
