पुरस्कार राशि ४० लाखले वृद्धि
काठमाडौं, ८ कात्तिक । नेपाल प्रिमियर लिग (एनपीएल) क्रिकेटको तेस्रो संस्करणको विजेता टोलीले एक करोड ५० लाख रुपैयाँ पुरस्कार पाउने भएको छ। नेपाल क्रिकेट संघ (क्यान) ले यसपटक उपाधि विजेताको पुरस्कार रकम अघिल्लो संस्करणभन्दा ४० लाख रुपैयाँ बढाएको हो।
क्यानले पत्रकार सम्मेलनमार्फत प्रतियोगिताको पुरस्कार राशि सार्वजनिक गरेको हो। क्यानका कोषाध्यक्ष पदमबहादुर खड्काका अनुसार दोस्रो हुने टोलीले ८० लाख, तेस्रो स्थान हासिल गर्ने टोलीले ४० लाख र चौथो हुने टोलीले ३० लाख रुपैयाँ प्राप्त गर्नेछन्।
यसअघि सम्पन्न दोस्रो संस्करणको उपाधि लुम्बिनी लायन्सले जितेको थियो। उक्त टोलीले एक करोड १० लाख रुपैयाँ पुरस्कार पाएको थियो। यसपटक विजेताको पुरस्कार बढाइएसँगै प्रतियोगिताको आकर्षण र व्यावसायिक महत्त्व थप बढ्ने क्यानको अपेक्षा छ।
एनपीएलको तेस्रो संस्करण सोमबारदेखि कीर्तिपुरस्थित त्रिवि अन्तर्राष्ट्रिय क्रिकेट मैदानमा सुरु हुँदैछ। प्रतियोगितामा अघिल्ला संस्करणमा जस्तै आठ टोलीले प्रतिस्पर्धा गर्नेछन्।
पुरस्कार रकममा भएको वृद्धिले टोलीहरूबीचको प्रतिस्पर्धा थप रोचक बनाउने र नेपाली क्रिकेटको व्यावसायिक विकासमा सहयोग पुग्ने अपेक्षा गरिएको छ।
